SURAH No. 111: AL-MASAD

 

SURAH No. 111: AL-MASAD

Naam
Pehli aayat ke lafz Lahab ko is surat ka naam qarar diya gaya hai.

Zamana Nuzool

Is ke Maki hone mein to mufassireen ke darmiyan koi ikhtilaf nahi hai, lekin theek theek ye muta'in karna mushkil hai ke Maki dor ke kis zamane mein nazil hui thi. Albatta Abu Lahab ka jo kirdar Rasool ﷺ aur aap ki dawat-e-haq ke khilaf tha is ko dekhte hue ye andaaza kiya ja sakta hai ke is surat ka nuzool is zamane mein hua hoga jab woh Huzoor ﷺ ki adawat mein had se guzar gaya tha aur iska rawaya Islam ki rah mein badi rukawat ban raha tha. Ba'id nahi ke is ka nuzool is zamane mein hua ho jab Rasool Allah ﷺ aur aap ke khandan walon ka muqata'a kar ke Quraysh ke logon ne unko Shaab Abi Talib mein mehsoor kar diya tha aur tanha Abu Lahab hi aisa shakhs tha jis ne apne khandan walon ko chhor kar dushmanon ka saath diya tha. Is qiyas ki buniyad ye hai ke Abu Lahab Huzoor ﷺ ka chacha tha, aur bhatije ki zuban se chache ki khulam khula mazhmat karana is waqt tak munasib na ho sakta tha jab tak chacha ki had se guzarne wali ziyadatain a'alani sab ke samne na aa gayi hon. Is se pehle agar ibtida hi ye surat nazil kar di gayi hoti to log isay ikhlaqi haisiyat se mai'oub samajhte ke bhatija apne chache ki is tarah mazhmat kare.

Pas Manzar

Quran Majeed mein ye ek hi maqam hai jahan dushmanan Islam mein se kisi shakhs ka naam le kar is ki mazhmat ki gayi hai, halankeh Makkah mein bhi aur hijrat ke baad Madinah mein bhi bahut se log aise the jo Islam aur Muhammad ﷺ ki adawat mein Abu Lahab se kisi tarah kam na the. Sawal ye hai ke is shakhs ki wo kya khasiyat thi jis ki buniyad par is ka naam le kar is ki mazhmat ki gayi? Is baat ko samajhne ke liye zaroori hai ke us waqt ke Arabi muashray ko samjha jaye, aur is mein Abu Lahab ke kirdar ko dekha jaye. Qadeem zamane mein chunanchah puray mulk Arab mein har taraf bad amni, ghatgari aur tawaa'if-ul-muluki phaili hui thi, aur sadiyon se halat ye thi ke kisi shakhs ke liye us ke apne khandan aur khooni rishtedaron ki himayat ke siwa jaan o maal aur izzat o abroo ke tahafuz ki koi guarantee nahi thi, is liye Arabi muashray ki ikhlaqi qadron mein silah-e-rahmi (yaani rishtedaron ke sath husn sulook) ko badi ahmiyat hasil thi, aur qata-e-rahmi ko bohot bara paap samjha jata tha. Arab ki inhi riwayaton ka ye asar tha ke Rasool Allah ﷺ jab Islam ki dawat le kar uthe to Quraysh ke doosre khandanon aur un ke sardaron ne to Huzoor ﷺ ki shadid mukhalafat ki, magar Bani Hashim aur Bani Mutalib (Hashim ke bhai Mutalib ki aulad) ne na sirf ye ke aap ki mukhalafat nahi ki, balki wo khulam khula aap ki himayat karte rahe, halankeh un mein se aksar log aap ki nabuwat par iman nahi laye the. Quraysh ke doosre khandan khud bhi Huzoor ﷺ ke in khooni rishtedaron ki himayat ko Arab ki ikhlaqi riwayat ke ain mutabiq samajhte the, isi wajah se unhon ne kabhi Bani Hashim aur Bani Mutalib ko ye ta'na nahi diya ke tum ek doosra din pesh karne wale shakhs ki himayat kar ke apne din aabayi se munharif ho gaye ho. Wo is baat ko jaante aur maante the ke apne khandan ke ek fard ko wo kisi halat mein is ke dushmanon ke hawale nahi kar sakte aur un ka apne azeez ki pashti bandi karna Quraysh aur Ahl Arab, sab ke nazar mein bilkul ek fitri amr tha. Is ikhlaqi usool ko, jise zamana-e-jahiliyat mein bhi Arab ke log wajib-ul-ihtiraam samajhte the, sirf ek shakhs ne Islam dushmani mein tor diya, aur wo tha Abu Lahab bin Abdul Mutalib. Ye Rasool Allah ﷺ ka chacha tha. Huzoor ﷺ ke walid-e-majid aur ye ek hi baap ke betay the. Arab mein chacha ko baap ki jagah samjha jata tha, khas taur par jab bhatije ka baap wafat paa chuka ho to Arabi muashray mein chacha se ye tawaqqo ki jati thi ke wo bhatije ko apni aulad ki tarah aziz rakhega. Lekin is shakhs ne Islam ki dushmani aur kufr ki mohabbat mein in tamam Arabi riwayaton ko paamala kar diya. Ibn Abbas (رض) se muta'adid sanadoun ke saath yeh riwayat Muhaddithin ne naqil ki hai ke jab Rasool Allah ﷺ ko dawat aam pesh karne ka hukm diya gaya aur Quran Majeed mein yeh hidayat nazil hui ke aap apne qareeb tareen azeezon ko sab se pehle Khuda ke azaab se daraein to aap ne subah sooreh Koh-e-Safa par charh kar buland aawaz se pukara "Ya Sabahah" (Hai subah ki aafat). Arab mein yeh sada woh shakhs lagata tha jo subah ke jhat patay mein kisi dushman ko apne qabilay par hamla karne ke liye aate dekh kar leta tha. Hazoor ﷺ ki yeh aawaaz sun kar logon ne daryaft kiya ke yeh kaun pukar raha hai. Bataya gaya ke yeh Muhammad ﷺ ki aawaaz hai. Is par Quraish ke tamam khandan ke log aap ki taraf dorh padhe. Jo khud aa sakta tha woh khud aaya, aur jo na aa sakta tha usne apni taraf se kisi ko bhej diya. Jab sab jama hogaye to aap ﷺ ne Quraish ke ek ek khandan ka naam le le kar pukara, "Ae Bani Hashim, Ae Bani Abdul Muttalib, Ae Bani Fahr, Ae Bani Fulan, Ae Bani Fulan, agar main tumhein yeh bataoon ke pahaar ke peeche ek lashkar tum par hamla karne ke liye tayaar hai to tum meri baat sach maanoge?" Logon ne kaha ke haan, humein kabhi tum se jhoot sunne ka tajurba nahin hua hai. Aap ne farmaya to main tumhein khabardaar karta hoon ke aage sakht azaab aa raha hai. Is par qabla iske ke koi aur bolta, Hazoor ﷺ ke apne chacha Abu Lahab ne kaha "Tabba lak alhaza jam'atana?" (Sityanas jaaye tera, kya is liye tu ne humein jama kiya tha?). Ek riwayat mein yeh bhi hai ke usne patthar utha liya taake Rasool Allah ﷺ par kheench maaray. Hawala: Musnad Ahmad, Bukhari, Muslim, Tirmidhi, Ibn Jareer. Ibn Zaid ki riwayat hai ke Abu Lahab ne Rasool Allah ﷺ se ek roz poocha agar main tumhare deen ko maan loon to mujhe kya milega? Aap ne farmaya jo aur sab imaan laane walon ko milega. Usne kaha mere liye koi fazilat nahin hai? Hazoor ﷺ ne farmaya aur aap kya chahte hain? Is par woh bola "Tabba lahaza aldeen, tabba an akoon wahaza sawa." (Nas jaaye is deen ka jis mein main aur yeh doosre log barabar hain). Hawala: Ibn Jareer. Makka mein Abu Lahab Hazoor ﷺ ka qareeb tareen humsaya tha. Dono ke ghar ek deewar beech waqiy the. Is ke ilawa Hakam bin Aas (Marwan ka baap), Uqbah bin Abi Mu'ait, Adi bin Hamra aur Ibn al-Sada al-Hudhali bhi aap ke humsaye the. Yeh log ghar mein bhi Hazoor ﷺ ko chain nahin lene dete the. Aap kabhi namaz parh rahe hote to yeh ooper se bakri ka oujh aap par phaink dete. Kabhi sahn mein khana pak raha hota to yeh handi par ghalazat phaink dete. Hazoor ﷺ baahar nikal kar in logon se farmate "Ae Bani Abdul Manaf, yeh kaisi humsaya hai?" Abu Lahab ki biwi Umm Jameel (Abu Sufyan ki behan) ne to yeh mustaqil tareeqa hi ikhtiyar kar rakha tha ke raaton ko aap ke ghar ke darwaze par khar dar jhaadiyaan la kar daal deti, taake subah sooreh jab aap ya aap ke bachay baahar nikalain to koi kanta paaon mein chubh jaaye. Hawala: Bayhaqi, Ibn Abi Hatim, Ibn Jareer, Ibn Asakir, Ibn Hisham. Nabuwat se pehle Rasool Allah ﷺ ki do sahibzaadiyaan Abu Lahab ke beton Utbah aur Utaybah se biyaahi hui thi. Nabuwat ke baad jab Hazoor ﷺ ne Islam ki taraf dawat deni shuru ki to is shakhs ne apne dono beton se kaha ke mere liye tum se milna haram hai agar tum Muhammad ﷺ ki betiyon ko talaq na de do. Chunaanchah dono ne talaq de di aur Utaybah to jahalat mein is qadar aage barh gaya ke ek roz Hazoor ke saamne aa kar usne kaha "An najm idha hawa" aur "Alladhi dana fatadalla" ka inkaar karta hoon, aur yeh keh kar usne Hazoor ﷺ ki taraf thooka jo aap par nahin pada. Hazoor ﷺ ne farmaya Khuda ya, is par apne kutton mein se ek kutta musallit kar de. Is ke baad Utaybah apne baap ke saath Shaam ke safar par rawana hogaya. Doran-e-safar mein ek aisi jagah qaflay ne padao kiya jahan maqami logon ne bataya ke raaton ko darinday aate hain. Abu Lahab ne apne saathi Ahl-e-Quraish se kaha ke mere betay ki hifazat ka kuch intezaam karo, kyun ke mujhe Muhammad ﷺ ki bad dua ka khauf hai. Is qaflay walon ne Utaybah ke gird har taraf apne oont bithaa diye aur pad kar so gaye. Raat ko ek sher aaya aur oonton ke halqe mein se guz kar usne Utaybah ko phaar khaya. Hawala: Al-Isti'ab li Ibn Abdul Barr, Al-Isabah li Ibn Hajar, Dalail al-Nubuwwah li Abu Na'im al-Asfahani, Rawdat al-Anf li al-Suhaili. Riwayat mein yeh ikhtilaf hai ke baaz raavi talaq ke maamlay ko ailan-e-nabuwat ke baad ka waqiya bayan karte hain aur baaz kehte hain ke yeh Tabbat Yada Abi Lahab ke nazool ke baad pesh aaya tha. Is amr mein bhi ikhtilaf hai ke yeh Abu Lahab ka ladka Utbah tha ya Utaybah lekin yeh baat saaf hai ke Fath-e-Makkah ke baad Utbah ne Islam qabool kar ke Hazoor ﷺ ke dast mubarak par bay'at ki. Is liye sahi baat yahi hai ke yeh ladka Utaybah tha. Is ke khabth nafs ka yeh haal tha ke jab Rasool Allah ﷺ ke sahibzada Hazrat Qasim ke baad doosre sahibzada Hazrat Abdullah ka bhi inteqal ho gaya to yeh apne bhatije ke gham mein shamil hone ke bajaye khushi khushi dohra hua Quraish ke sardaron ke paas pohanch gaya aur unhein khabar di ke lo, aaj Muhammad ﷺ be-nam o nishan ho gaye. (Mulahiza kijiye: Surah Kausar). Rasool Allah ﷺ jahan jahan bhi Islam ki dawat dene ke liye tashrif le jaate, yeh aap ke peeche peeche jaata aur logon ko aap ﷺ ki baat sunne se rokta. Rabi'ah bin Abbad al-Daili (رض) bayan karte hain ke main no umr tha jab apne baap ke saath Dhul-Majaz ke bazaar mein gaya. Wahan maine Rasool Allah ﷺ ko dekha ke aap keh rahe the "Logon, kaho Allah ke siwa koi maabood nahin, falaah paoge" aur aap ke peeche peeche ek shakhs keh raha tha ke "Yeh jhoot hai, deen aabai se phir gaya hai". Maine poocha yeh kaun shakhs hai? Logon ne kaha yeh un ka chacha Abu Lahab hai. Hawala: Musnad Ahmad, Bayhaqi. Doosri riwayat inhi Hazrat Rabi'ah se hai ke maine Rasool Allah ﷺ ko dekha aap ek ek qabile ke padao par jaate hain aur farmate hain "Ae Bani Fulan, main tumhari taraf Allah ka Rasool hoon. Tumhein hidayat karta hoon ke sirf Allah ki ibadat karo aur is ke saath kisi ko sharik na karo. Tum meri tasdiq karo aur mera saath do taake main woh kaam poora karun jiske liye Allah ne mujhe bheja hai." Aap ke peeche peeche ek aur shakhs aata hai aur woh keh raha hai ke "Ae Bani Fulan, yeh tum ko Laat o Uzza se pheer kar is bid'at aur gumraahi ki taraf le jana chahta hai jise yeh le kar aaya hai. Is ki baat harghiz na maano aur is ki pehri na karo". Maine apne baap se poocha yeh kaun hai. Unhone kaha yeh un ka chacha Abu Lahab hai. Hawala: Musnad Ahmad, Tabarani. Tareeq bin Abdullah al-Muharibi (رض) ki riwayat bhi is se milti julati hai. Woh kehte hain maine Dhul-Majaz ke bazaar mein dekha Rasool Allah ﷺ logon se kehte ja rahe hain ke "Logon, la ilaha illallah kaho, falaah paoge" aur peeche ek shakhs hai jo aap ko patthar maar raha hai. Yahaan tak ke aap ﷺ ki aediyan khoon se tar ho gayi hain aur woh keh jaata hai ke "Yeh jhoot hai, is ki baat na maano". Maine logon se poocha yeh kaun hai? Logon ne kaha yeh un ka chacha Abu Lahab hai. Hawala: Tirmidhi. Nabuwat ke saatve saal jab Quraish ke tamam khandanun ne Bani Hashim aur Bani Muttalib ka muasharti aur ma'ashi muqata'a kiya aur yeh dono khandan Rasool Allah ﷺ ki himayat par sabit qadam rahte hue Sha'ab Abi Talib mein muhasar ho gaye to tanha yeh Abu Lahab tha jisne apne khandan ka saath dene ke bajaye kuffar Quraish ka saath diya. Yeh muqata'a teen saal tak jari raha aur is doran Bani Hashim aur Bani Muttalib par faqoon ki nubat aa gayi. Magar Abu Lahab ka haal yeh tha ke jab Makkah mein koi tijarti qafila aata aur Sha'ab Abi Talib ke muhasireen mein se koi khoraak ka samaan khareedne ke liye is ke paas jaata to yeh tajiron se pukar kar kehta ke in se itni qeemat maango ke yeh khareed na sakein, tumhein jo khasara bhi hoga usay main poora kar dunga. Chunaanchah woh behataash qeemat talab karte aur khareedaar bechara apne bhook se tarapte hue baal bachon ke paas khaali haath palat jata. Phir Abu Lahab unhi tajiron se wahi cheezen bazaar ke bhao kharid leta. Hawala: Ibn Sa'd, Ibn Hisham. Yeh is shakhs ki harkatein thi jin ki bina par is surat mein naam le kar is ki madmat ki gayi hai. Khaas tor par is ki zaroorat is liye thi ke Makkah se baahar ke Ahl-e-Arab jo Hajj ke liye aate, ya mukhtalif maqamat par lagne wale bazaars mein jamaa hote, unke samne jab Rasool Allah ﷺ ka apna chacha aap ke peeche lag kar aap ki mukhalifat karta, to woh Arab ki ma'roof riwayaton ke lehaaz se yeh baat khilaf e tawaqqo samajhte the ke koi chacha bina wajah doosron ke samne apne bhatije ko bura bhala kahe aur isay patthar maaray aur is par ilzam tarashiyan kare. Isi wajah se woh Abu Lahab ki baat se mutasir ho kar Rasool Allah ﷺ ke bare mein shak mein pad jaate lekin jab yeh surat nazil hui aur Abu Lahab ne ghusse mein bahrup kar ul fool bakna shuru kar diya to logon ko maloom hogaya ke Rasool Allah ﷺ ki mukhalifat mein is shakhs ka qawl qabil e aitbaar nahin hai kyunki yeh apne bhatije ki dushmani mein deewana ho raha hai. Is ke ilawa naam le kar jab aap ﷺ ke chacha ki madmat ki gayi to logon ko yeh tawaqqo hamesha ke liye khatam hogayi ke Rasool Allah ﷺ deen ke maamlay mein kisi ka lehaaz kar ke koi mudaahat barat sakte hain. Jab ala-al-‘alan Rasool ke apne chacha ki khabar le di gayi to log samajh gaye ke yahan kisi laag lipait ki gunjaish nahin hai. Ghair apna hosakta hai agar imaan le aaye, aur apna ghair ho jata hai agar kufr kare. Is maamlay mein falan ibn falan koi cheez nahin hai.

 

 

 

 

 

 

 

 

 

 

 

 

 

 

 

 

 

﷽

ﮈ ﮉ ﮊ ﮋ ﮌ ﮍ

1: Toot gaye Abu Lahab ke haath aur na-murad ho gaya woh. 1

Tafseer: 

Surah Lahab 1 

Is shakhs ka asal naam Abdul Uzza tha, aur isay Abu Lahab is liye kaha jata tha ke iska rang bohot chamakta hua surkh-o-safed tha. "Lahab" aag ke sholay ko kehtay hain aur Abu Lahab ke ma'ni hain "shola." Yahan iska zikr uske naam ke bajaye uski kunyat se karne ke kai wujuh hain. Ek yeh ke woh zyada tar apne naam se nahi, balkay apni kunyat se hi ma'roof tha. Dosray yeh ke uska naam Abdul Uzza (bandah Uzza) aik mushrikana naam tha aur Qur'an mein yeh pasand nahi kiya gaya ke usay is naam se yaad kiya jaye. Teesray yeh ke uska jo anjaam is surah mein bayan kiya gaya hai, uske sath iski yeh kunyat hi zyada munaasib rehti hai.

 

"Tabbat yada Abi Lahabin" ke ma'ni ba'az mufassireen ne "toot jayein Abu Lahab ke haath" bayan kiye hain aur "wa tabb" ka matlab yeh bayan kiya hai ke "woh halaak ho jaye" ya "woh halaak ho gaya." Lekin darhaqeeqat yeh koi kosna nahi hai jo usay diya gaya ho, balkay ek peshingoie hai jismein aindah pesh aane wali baat ko mazi ke sighon mein bayan kiya gaya hai, goya iska hona aisa yaqini hai jaise woh ho chuki. Aur fil waqeh aakhir kar wohi kuch hua jo is surah mein chand saal pehle bayan kiya ja chuka tha. Haath tootne se muraad zahir hai ke jismani haath tootna nahi hai, balkay kisi shakhs ka apne us maqsad mein qata'an nakam ho jaana hai jiske liye usne apna poora zor laga diya ho. Aur Abu Lahab ne Rasool Allah ﷺ ki dawat ko zak dene ke liye waqai apna poora zor laga diya tha. Lekin is surah ke nazool par saat aath saal hi guzray thay ke jang-e-Badr mein Quraish ke aksar-o-bishtar woh baray baray sardar maray gaye jo Islam ki dushmani mein Abu Lahab ke saathi thay. Makka mein jab is shikast ki khabar pohanchi to usay itna ranj hua ke woh saat din se zyada zinda na reh saka. Phir uski maut bhi nihayat ibratnaak thi. Usay "Adasa" (Malignant Pustule) ki bimari ho gayi jiske sabab uske ghar walon ne usay chor diya, kyunke unhein chhoot lagne ka darr tha. Marnay ke baad bhi teen roz tak koi uske paas na aaya yahan tak ke uski laash sar gayi aur uski boo phailne lagi. Aakhir kar jab logon ne uske beton ko taane denay shuru kiye to aik riwayat yeh hai ke unhon ne kuch Habshiyon ko ujrat de kar uski laash uthwai aur unhi mazdooron ne usay dafn kiya. Aur doosri riwayat yeh hai ke unhon ne aik garha khudwaya aur lakrion se uski laash ko dhakel kar usme phenka aur upar se mitti pathar daal kar usay dhaank diya. Uski mazeed aur mukammal shikast is tarah hui ke jis deen ki raah roknay ke liye usne eidi choti ka zor laga diya tha, usi deen ko uski aulaad ne qabool kiya. Sabse pehle uski beti Durrah hijrat karke Makka se Madinah pohanchi aur Islam layi, phir fatah-e-Makka par uske dono betay Utbah aur Mu'tib Hazrat Abbas ki wasatat se huzoor ke samne pesh huay aur imaan la kar unhon ne aap ke dast-e-mubarak par bai'at ki.

ﮎ ﮏ ﮐ ﮑ ﮒ ﮓ ﮔ

2: Uska maal aur jo kuch usne kamaya woh uske kisi kaam na aaya. 2

Tafseer:
Soorah Al-Lahab 2

Abu Lahab sakht bakheel aur zarparast aadmi tha. Ibn e Aseer ka bayaan hai ke zamana e jahiliyat mein ek martaba is par yeh ilzaam bhi lagaya gaya tha ke us ne Ka'bah ke khazanay mein se soney ke do hiran chura liye hain. Agarche baad mein woh hiran ek aur shakhs ke paas se bar aamad huye, lekin bajaye khud yeh baat ke is par yeh ilzaam lagaya gaya, yeh zaahir karti hai ke Makkah ke log is ke bare mein kya raaye rakhte thay.
Is ki maldaari ke mutaliq Qazi Rasheed bin Zubair apni kitaab Al-Zakhair wal-Hif mein likhte hain ke woh Quraish ke un chaar aadmiyon mein se ek tha jo ek qintar soney ke maalik thay (qintar do so awqiya ka aur ek awqiya sawa teen tolay ka hota hai). Is ki zarparasti ka andaaza is amar se kiya jaa sakta hai ke jang e Badr ke moqay par jabke us ke mazhab ki qismat ka faisla honay wala tha, Quraish ke tamam sardaar larnay ke liye gaye, magar is ne Aas bin Hishaam ko apni taraf se larnay ke liye bhej diya aur kaha ke yeh us chaar hazaar dirham qarz ka badal hai jo mera tum par aata hai. Is tarah is ne apna qarz wasool karne ki bhi ek tarkeeb nikaal li, kyunke Aas diwaliya ho chuka tha aur is se raqam milne ki koi umeed na thi.

"Maa Kasab" ko baaz mufassireen ne kamaayi ke ma'ni mein liya hai, yaani apne maal se jo munafa is ne haasil kiya woh us ka kasb tha. Aur baaz doosray mufassireen ne is se muraad aulaad li hai, kyunke Rasool Allah ﷺ ne farmaya hai ke aadmi ka beta bhi us ka kasb hai (Abu Dawood, Ibn Abi Haatim).

Yeh dono ma'ni Abu Lahab ke anjaam se munaasib rakhte hain. Kyunke jab woh 'Adasah ke marz mein mubtala hua to us ka maal bhi us ke kisi kaam na aaya aur us ki aulaad ne bhi usay be-kasi ki maut marne ke liye chor diya. Us ka janazah tak izzat ke sath uthane ki is aulaad ko taufeeq na hui. Is tarah chand hi saal ke andar logon ne is paishin-goi ko poora hotay dekh liya jo Abu Lahab ke mutaliq is soorah mein ki gayi thi.

ﮕ ﮖ ﮗ ﮘ ﮙ

3: Zaroor woh shola zan Aag mein dala jayega.

ﮚ ﮛ ﮜ ﮝ

4: Aur (us ke saath) uski joru (wife) bhi, 3 lagai bujhai karne wali, 4

Tafseer:
Soorah Al-Lahab, Aayah 3

Is aurat ka naam Arwa tha aur Umm Jameel is ki kuniyat thi. Yeh Abu Sufyaan ki behan thi aur Rasool Allah ﷺ ke saath 'adaawat mein apne shohar Abu Lahab se kisi tarah kam na thi. Hazrat Abu Bakr ki sahabzadi Hazrat Asmaa ka bayan hai ke jab yeh soorah naazil hui aur Umm Jameel ne is ko suna to woh biphri hui Rasool Allah ﷺ ki talaash mein nikli. Is ke haath mein mutthi bhar pathar thay aur woh Huzoor ki hujo mein apne hi kuch ashaar parhti ja rahi thi. Haram mein pohanchi to wahan Hazrat Abu Bakr ke saath Huzoor tashreef farma thay. Hazrat Abu Bakr ne arz kiya ya Rasool Allah, yeh aa rahi hai aur mujhe andesha hai ke aap ko dekh kar yeh koi behoodgi karegi. Huzoor ne farmaya yeh mujhe nahi dekh sakegi. Chunancha aisa hi hua ke aap ke maujood honay ke bawajood woh aap ko nahi dekh saki aur us ne Hazrat Abu Bakr se kaha ke maine suna hai tumhare sahib ne meri hujo ki hai. Hazrat Abu Bakr ne kaha, is ghar ke Rab ki qasam unhon ne to tumhari koi hujo nahi ki. Is par woh wapas chali gayi (Ibn Abi Haatim. Seerat Ibn Hishaam. Bazzaar ne Hazrat Abdullah bin Abbas se bhi isi se milta julta waqiya naqal kiya hai). Hazrat Abu Bakr ke is jawab ka matlab yeh tha ke hujo to Allah Ta'ala ne ki hai, Rasool Allah ﷺ ne nahi ki.

Soorah Al-Lahab 4

Asal alfaaz hain حَمَّالَةَ الْحَطَبِ jinka lafzi tarjuma hai "lakriyan dhonay wali." Mufassireen ne is ke muta'addid ma'ni bayan kiye hain. Hazrat Abdullah bin Abbas, Ibn Zaid, Zuhaak aur Bai bin Anas r.a. kehte hain ke woh raton ko khaardaar darakhton ki tehniyaan laakar Rasool Allah ﷺ ke darwazay par dal deti thi, is liye us ko lakriyan dhonay wali kaha gaya hai. Qataadah, 'Ikrimah, Hasan Basri, Mujahid aur Sufyan Thawri r.a. kehte hain ke woh logon mein fasaad dlawanay ke liye chughliyaan khati phirti thi, is liye usay Arabi muhawaray ke mutabiq lakriyan dhonay wali kaha gaya, kyun ke Arab aise shakhs ko jo idhar ki baat udhar laga kar fasaad ki aag bharakaane ki koshish karta ho, lakriyan dhonay wala kehte hain. Is muhawaray ke lehaaz se حَمَّالَةَ الْحَطَبِ ke ma'ni theek theek wohi hain jo Urdu mein "Bai Jamaalo" ke ma'ni hain. Saeed bin Jubair kehte hain ke jo shakhs gunaahon ka bojh apne upar laad raha ho us ke mutaliq Arabi zubaan mein batoor muhawara kaha jata hai فلان یحتطب علی ظھرہ "Fulan shakhs apni peeth par lakriyan laad raha hai." Pas حَمَّالَةَ الْحَطَبِ ke ma'ni hain gunaahon ka bojh dhonay wali. Ek aur matlab mufassireen ne iska yeh bhi bayan kiya hai ke yeh aakhirat mein iska haal hoga, yaani woh lakriyan la la kar us aag mein dalegi jis mein Abu Lahab jal raha hoga.

ﮞ ﮟ ﮠ ﮡ ﮢ ﮣ

5:Uski gardan mein moonj (palm-fibre) ki rassi hogi 5

Tafseer: 

Soorah Al-Lahab 5 

Is ki gardan ke liye "jeed" ka lafz istemal kiya gaya hai jo Arabi zubaan mein aisi gardan ke liye bola jata hai jismein zewar pehna gaya ho. Sa'eed bin al-Musayyib, Hasan Basri, aur Qatada (r.a) kehte hain ke woh ek bohot qeemti haar gardan mein pehenti thi, aur kaha karti thi ke "Laat aur Uzza ki qasam, main apna yeh haar bech kar iski qeemat Muhammad ﷺ ki adawat mein kharch kar dungi." Isi bunyaad par "jeed" ka lafz yahan bator tanz istemal kiya gaya hai ke is mazeen galle mein jiske haar par woh fakhr karti hai, dozakh mein rassi pari hogi. Yeh isi tarah ka tanzya andaaz e kalaam hai jaise Quran Majeed mein muta'addid maqamat par farmaya gaya hai "Fabash-shirhum bi'azaab-in-aleem" — inko dardnaak azaab ki khushkhabri de do. 

Jo rassi is ki gardan mein daali jayegi us ke liye "Hablum min masad" ke alfaaz istemal kiye hain, ya'ni woh rassi masad ki qism se hogi. Is ke mukhtalif ma'ni ahl-e-lughat aur mufassireen ne bayan kiye hain. Ek qoul yeh hai ke khoob mazboot bunti hui rassi ko masad kehte hain. Doosra qoul yeh hai ke khajoor ki chaal se bani hui rassi ke liye yeh lafz bola jata hai. Teesra qoul yeh hai ke is ke ma'ni hain moonj ki rassi ya oont ki khaal ya is ke soof se bani hui rassi. Aur ek qoul yeh bhi hai ke is se muraad lohay ke taaron se bunti hui rassi hai.