SURAH No. 110 AN-NASR

 

SURAH No. 110 AN-NASR

Naam 

Pehli aayat "Izaa jaa'a nasrullahi" ke lafz "nasr" ko is soorat ka naam qarar diya gaya hai. 

 

Zamana e Nuzool 

Hazrat Abdullah bin Abbas (رض) ka bayaan hai ke yeh Quran Majeed ki aakhri soorat hai, yaani is ke baad koi mukammal soorat Rasool Allah ﷺ par naazil nahi hui. (Hawalah: Muslim, Nisai, Tabrani, Ibn Abi Shaibah, Ibn Mardawayah). 

Hazrat Abdullah bin Umar (رض) ki riwayat hai ke yeh soorat Hujjatul Wida ke moqa par ayyam e tashreeq ke wast mein maqam e Mina mein naazil hui aur is ke baad Rasool Allah ﷺ ne oontni par sawar hokar apna mashhoor khutba irshaad farmaya (Hawalah: Tirmizi, Bazar, Baihaqi, Ibn Abi Shaibah, Abdul bin Hameed, Abu Ya'la, Ibn Mardawayah). Baihaqi ne "Kitaab ul Hajj" mein Hazrat Sura bint Banhan ki riwayat se Rasool Allah ﷺ ka woh khutba naqal kiya hai jo aap ne is moqa par irshaad farmaya tha. Woh kehti hain ke: 

 

"Main ne Hujjatul Wida mein Rasool Allah ﷺ ko ye farmaate suna ke 'Logo, jaan'tay ho yeh konsa din hai?' Logo ne arz kiya: Allah aur uss ke Rasool ko zyada ilm hai. Aap ﷺ ne farmaaya 'Yeh ayyam e tashreeq ke beech ka din hai.' Phir aap ne poocha 'Jaan'tay ho yeh konsa maqam hai?' Logo ne arz kiya: Allah aur uss ke Rasool ko zyada ilm hai. Aap ﷺ ne farmaaya 'Yeh Mash'ar Haraam hai.' Phir Rasool Allah ﷺ ne farmaaya ke 'Main nahi jaanta, shayad is ke baad main tum se na mil sakoon. Khabardaar raho, tumhare khoon aur tumhari izzat ek doosray par isi tarah haraam hai jis tarah yeh din aur yeh maqam haraam hai, yahan tak ke tum apne Rab ke samne haazir ho aur woh tum se tumhare aamaal ke bare mein sawaal kare. Suno, yeh baat tum mein se qareeb waalay door walay tak pohcha day. Suno, kya main ne tumhein paighaam pohcha diya?' 

 

Is ke baad jab hum log Madina wapas aaye to kuch zyada din na guzray thay ke Rasool Allah ﷺ ka intiqal ho gaya." 

 

In dono riwayaton ko mila kar dekha jaye to maaloom hota hai ke Soorah Nasr ke nuzool aur Rasool Allah ﷺ ki wafat ke darmiyan teen mahine kuch din ka faasl tha, kyunke tareekh ki ro se Hujjatul Wida aur Rasool Allah ﷺ ke wisaal ke darmiyan itna hi zamana guzra tha. 

Ibn Abbas (رض) ka bayaan hai ke jab yeh soorat naazil hui to Rasool Allah ﷺ ne farmaaya: "Mujhe meri wafat ki khabar de di gayi hai aur mera waqt aan poora hua." (Hawalah: Musnad Ahmed, Ibn Jareer, Ibn Mundhir, Ibn Mardawayah). 

Doosri riwayat jo Hazrat Abdullah bin Abbas se manqool hui hain, un mein bayaan kiya gaya hai ke is soorat ke nuzool se Rasool Allah ﷺ ne yeh samajh liya tha ke aap ko duniya se rukhsat hone ki ittila de di gayi hai (Hawalah: Musnad Ahmed, Ibn Jareer, Nisai, Ibn Abi Haatim, Ibn Mardawayah). Ummul Momineen Hazrat Umm Habiba (رض) farmati hain ke jab yeh soorat naazil hui to Rasool Allah ﷺ ne farmaaya: "Is saal mera inteqaal hone wala hai." Yeh baat sun kar Hazrat Fatima (رض) ro deen. Is par aap ﷺ ne farmaaya: "Mere khandaan mein se tum hi sab se pehle mujh se aa kar milo gi." Yeh sun kar woh hans deen (Hawalah: Ibn Abi Haatim, Ibn Mardawayah). 

 

Qareeb qareeb isi mazmoon ki riwayat Baihaqi ne Ibn Abbas (رض) se naqal ki hai. Ibn Abbas (رض) farmate hain ke Hazrat Umar (رض) mujhe Ghazw-e-Badr mein shareek hone walay baray baray shuyukh ke sath apni majlis mein bulaate thay. Yeh baat baaz barzon ko nagawaar guzri aur unhon ne kaha ke hamaray ladke bhi to isi ladke jaise hain, is ko khaas tor par kyun hamaray sath shareek e majlis kiya jata hai? (Imam Bukhari aur Ibn Jareer ne tasreeh ki hai ke yeh baat kehne walay Hazrat Abdur Rahman bin Auf (رض) thay). Hazrat Umar (رض) ne farmaaya: "Ilm ke lehaaz se is ka jo maqam hai woh aap log jaante hain." Phir ek roz unhon ne shuyukh e Badr ko bulaya aur mujhe bhi un ke sath bula liya. Main samajh gaya ke aaj mujhe yeh dikhane ke liye bulaya gaya hai ke mujh ko un ki majlis mein kyun shareek kiya jata hai. Dauran e guftagu mein Hazrat Umar (رض) ne shuyukh e Badr (رض) ajmaeen se poocha: "Aap hazraat 'Izaa jaa'a Nasrullahi wal-Fath' ke bare mein kya kehte hain?" Baaz ne kaha: "Is mein humein hukam diya gaya hai ke jab Allah ki nusrat aaye aur hum ko fatah naseeb ho to hum Allah ki hamd aur us se istighfaar karein." Baaz ne kaha: "Is se muraad shehron aur qilaon ki fatah hai." Baaz khamosh rahe. Is ke baad Hazrat Umar (رض) ne kaha: "Ibn Abbas (رض), kya tum bhi yahi kehte ho?" Main ne kaha: "Nahi." Unhon ne poocha: "Phir tum kya kehte ho?" Main ne arz kiya: "Is se muraad Rasool Allah ﷺ ki ajal hai. Is mein Rasool Allah ﷺ ko khabar di gayi hai ke jab Allah ki nusrat aa jaye aur fatah naseeb ho jaye to yeh is baat ki alamat hai ke aap ﷺ ka waqt aan poora hua, is ke baad aap Allah ki hamd aur istighfaar karein." Is par Hazrat Umar (رض) ne farmaaya: "Main bhi is ke siwa kuch nahi jaanta jo tum ne kaha hai." 

 

Ek riwayat mein is par yeh izafa hai ke Hazrat Umar ne shuyukh e Badr se farmaaya: "Aap log mujhe kaise malaamat karte hain jab ke is ladke ko is majlis mein shareek karne ki wajah aap ne dekh li." (Hawalah: Bukhari, Musnad Ahmed, Tirmizi, Ibn Jareer, Ibn Mardawayah, Bagawi, Baihaqi, Ibn Mundhir). 

 

Mauzoo aur Mazmoon 

Jaisa ke mundarja baala riwayaat se maaloom hota hai, is soorat mein Allah Ta'ala ne Rasool Allah ﷺ ko yeh bata diya tha ke jab Arab mein Islam ki fatah mukammal ho jaye aur log Allah ke deen mein fauj dar fauj daakhil hone lagen to is ke ma'ni yeh hain ke woh kaam mukammal ho gaya hai jis ke liye aap duniya mein bheje gaye thay. Is ke baad aap ko hukam diya gaya ke aap Allah ki hamd aur us ki tasbeeh karne mein mashghool ho jayein ke us ke fazal se aap itna bara kaam anjaam dene mein kaamyab huye, aur us se dua karein ke is khidmat ki anjaam dahee mein jo bhool chook ya kotahi bhi aap se hui ho, usay woh maaf farma de. Is maqam par aadmi ghour kare to dekh sakta hai ke ek nabi aur ek aam duniya dar rehnuma ke darmiyan kitna azeem farq hai. Kisi duniya dar rehnuma ko agar apni zindagi hi mein woh inqilab azeem barpa karne mein kaamyabi naseeb ho jaye jis ke liye woh kaam karne utha ho to is ke liye yeh jashn manane aur apni qiyaadat par fakhr karne ka moqa hota hai, lekin yahan Allah ke paighambar ko hum dekhte hain ke us ne 23 saal ki mukhtasir muddat mein ek poori qoum ke aqaid, afkaar, aadat, akhlaq, tamaddun, tahzeeb, muashrat, ma'eeshat, siyaasat aur harbi qabiliyat ko bilkul badal dala aur jahalat wa jaahiliyat mein doobi hui qoum ko utha kar is qabil bana diya ke woh duniya ko musakhar kar de aur aqwam e aalam ki imaam ban jaye, magar aisa azeem kaarnama us ke haathon anjaam paane ke baad usay jashn manane ka nahi, balki Allah ki hamd aur tasbeeh karne aur us se maghfirat ki dua karne ka hukam diya jata hai, aur woh poori aajzi ke sath is hukm ki tameel mein lag jata hai. 

 

Hazrat Ayesha (رض) farmati hain ke Rasool Allah ﷺ apni wafat se pehle "Subhanaka Allahumma wa bihamdika astaghfiruka wa atubu ilaika" (baaz riwayat mein alfaaz yeh hain "Subhanallah wa bihamdihi astaghfirullah wa atubu ilaih") kasrat se parhte thay. Main ne arz kiya: "Ya Rasool Allah, yeh kaise kalimat hain jo aap ne ab parhne shuru kar diye hain?" Farmaaya: "Mere liye ek alamat muqarrar kar di gayi hai ke jab main isay dekhoon to yeh alfaaz kaha karoon aur woh hai 'Izaa jaa'a nasrullahi wal fath.'" (Hawalah: Musnad Ahmed, Ibn Jareer, Ibn Mundhir, Ibn Mardawayah). 

 

Is se milti julti baaz riwayaat mein Hazrat Ayesha (رض) ka bayaan hai ke aap ﷺ apne ruku' wa sujood mein bakasrat yeh alfaaz kehte thay: "Subhanaka Allahumma wa bihamdika, Allahummaghfirli." Yeh Quran (yaani Soorah Nasr) ki ta'weel thi jo aap ﷺ ne farmaayi thi (Hawalah: Bukhari, Muslim, Abu Dawood, Nisai, Ibn Majah, Ibn Jareer). 

Hazrat Umm Salma (رض) farmati hain ke Rasool Allah ﷺ ki zubaan e mubarak par aap ke aakhri zamaana e hayat mein uthtay baithtay aur jatay aatay yeh alfaaz jari rehtay thay: "Subhanallah wa bihamdihi." Main ne ek roz poocha: "Ya Rasool Allah, aap kasrat se yeh zikr kyun karte rehte hain?" Farmaaya: "Mujhe iska hukam diya gaya hai." Phir aap ne yeh soorat padhi (Hawalah: Ibn Jareer). Hazrat Abdullah bin Masood (رض) ki riwayat hai ke jab yeh soorat naazil hui to Rasool Allah ﷺ bakasrat yeh zikr farmate rehte: "Subhanaka Allahumma wa bihamdika, Allahummaghfirli, Subhanaka Rabbana wa bihamdika, Allahummaghfirli, innaka anta attawwab alghafur." (Hawalah: Ibn Jareer, Musnad Ahmed, Ibn Abi Haatim). Ibn Abbas (رض) ka bayaan hai ke is soorat ke naazil hone ke baad Rasool Allah ﷺ aakhirat ke liye mehnat o riyaazat karne mein is qadr shiddat ke sath mashghool ho gaye jitne is se pehle kabhi na hue thay. (Hawalah: Nisai, Tabrani, Ibn Abi Haatim, Ibn Mardawayah).

 

 

 

 

 

 

 

 

 

 

 

 

 

﷽

ﭱ ﭲ ﭳ ﭴ ﭵ ﭶ

1:Jab Allah ki madad aa jaaye aur fatah naseeb ho jaaye. 1

Tafseer: 

Soorah An-Nasr 1 

Fath se muraad kisi ek ma'rake mein fath nahi, balki woh faisla kun fath hai jiske baad mulk mein koi taaqat Islam se takra lene ke qabil baqi na rahe aur yeh amar waazeh ho jaye ke ab Arab mein isi deen ko ghalib ho kar rehna hai. Baaz mufassireen ne is se muraad Fath e Makkah li hai. Lekin Fath e Makkah 8 Hijri mein hui thi aur is soorah ka nazool 10 Hijri ke aakhir mein hua hai, jaisa ke Hazrat Abdullah bin Umar aur Hazrat Saraa bint Banhaan ki in riwayaat se maaloom hota hai jo hum ne deebaachay mein naql ki hain. 

Alaawa bar een, Hazrat Abdullah bin Abbas ka yeh qawl bhi is tafseer ke khilaaf padta hai ke yeh Qur'an Majeed ki sabse aakhri soorah hai. Kyunke agar fath se muraad Fath e Makkah ho to poori Soorah Tawbah is ke baad naazil hui thi, phir yeh soorah aakhri soorah kaise ho sakti hai. Bila shuba Fath e Makkah is lehaz se faisla kun thi ke is ne mushrikeen e Arab ki himmatain past kar di thi, magar is ke baad bhi un mein kaafi dam kham baqi tha. Ta'if aur Hunain ke ma'rakey is ke baad hi pesh aaye aur Arab par Islam ka ghalba mukammal honay mein taqreeban do saal sirf huay. 

ﭷ ﭸ ﭹ ﭺ ﭻ ﭼ ﭽ ﭾ

2: Aur (aey Nabi) tum dekhlo ke log fauj dar fauj Allah ke deen mein daakhil ho rahe hain. 2

Tafseer: 

Soorah An-Nasr 2 

Yani woh zamana rukh-sat ho jaye jab ek ek do do kar ke log Islam mein daakhil hotay thay aur woh waqt aa jaye jab poore poore qabeeley, aur baday baday ilaqon ke bashinday kisi jang aur kisi muzahmat ke baghair az khud musalmaan honay lagain. Yeh kefiyat 9 Hijri ke aghaaz se ro'nama honi shuru hui jis ki wajah se is saal ko "Sa'al ul-Wufood" kaha jata hai. Arab ke goshay goshay se wafd par wafd Rasool Allah ﷺ ki khidmat mein haazir honay lagay aur Islam qabool kar ke aap ke dast e mubarak par bai'at karne lagay. Yahan tak ke 10 Hijri mein jab Huzoor Hajj-ul-Widaa' ke liye tashreef le gaye, us waqt poora Arab Islam ke zair e nigeen ho chuka tha aur mulk mein koi mushrik baaqi na raha tha.

ﭿ ﮀ ﮁ ﮂﮃ ﮄ ﮅ ﮆ ﮇ

3:To apne Rubb ki hamd ke saath uski tasbeeh karo 3 aur us se magfirat ki duaa maango. 4 Beshak woh bada tauba qabool karne wala hai.

Tafseer: 

Soorah Al-Nasr 3 

 

Hamd se muraad Allah Ta'ala ki tareef o sana karna bhi hai aur iska shukr ada karna bhi. Aur tasbeeh se muraad Allah Ta'ala ko har lehaaz se paak aur munazzah qarar dena hai. Is moqay par yeh irshaad ke apne Rab ki qudrat ka yeh karishma jab tum dekh lo to uski hamd ke saath uski tasbeeh karo, is mein hamd ka matlab yeh hai ke is azeem kaamyabi ke mutaliq tumhare dil mein kabhi is khayal ka koi shaiybah tak na aaye ke yeh tumhare apne kamaal ka natija hai, balki isko sarasar Allah ka fazl o karam samjho, is par uska shukr ada karo, aur qalb o zabaan se is amr ka aitiraaf karo ke is kaamyabi ki saari tareef Allah hi ko pohanchti hai. Aur tasbeeh ka matlab yeh hai ke Allah ko is se paak aur munazzah qarar do ke uske kalimay ka buland hona tumhari kisi saai o koshish ka mohtaaj ya is par munhasir tha. Iske bar'aks tumhara dil is yaqeen se labraiz rahe ke tumhari saai o koshish ki kaamyabi Allah ki taa'eed o nasr par munhasir thi, woh apne jis banday se chahta apna kaam le sakta tha aur yeh uska ehsaan hai ke usne yeh khidmat tum se li aur tumhare haathon apne deen ka bol bala karaya. 

 

Is ke ilawa tasbeeh, yaani Subhan Allah kehne mein ek pehlu ta'ajjub ka bhi hai. Jab koi mohair ul aqool waqiya pesh aata hai to aadmi Subhan Allah kehta hai, aur iska matlab yeh hota hai ke Allah hi ki qudrat se aisa herat angez waqiya ro'nama hua hai warna duniya ki kisi taqat ke bas mein na tha ke aisa karishma is se saadir ho sakta. 

 

Soorah Al-Nasr 4 

Yaani apne Rab se dua maango ke jo khidmat usne tumhare supurd ki thi usko anjaam dene mein tum se jo bhool chook ya kotahi bhi hui ho us se chashm poshi aur darguzar farmaaye. Yeh hai woh adab jo Islam mein banday ko sikhaya gaya hai. Kisi insaan se Allah ke deen ki khwaah kaise hi barri se barri khidmat anjaam payi ho, uski raah mein khwah kitni hi qurbanian usne di hon aur uski ibadat o bandagi baja lanay mein khwah kitni hi jaan fishaniyaan usne ki hon, iske dil mein kabhi yeh khayal tak na aana chahiye ke mere upar mere Rab ka jo haq tha woh maine poora ka poora ada kar diya hai, balki use hamesha yahi samajhna chahiye ke jo kuch mujhe karna chahiye tha woh main nahin kar saka, aur use Allah se yeh dua mangni chahiye ke iske haq ada karne mein jo kotahi bhi mujh se hui ho us se darguzar farma kar meri haqeer si khidmat qubool farma le. 

 

Yeh adab jab Rasool Allah ﷺ ko sikhaya gaya jinn se barh kar khuda ki raah mein saai o jehd karne wale kisi insaan ka tasavvur tak nahin kiya ja sakta, to doosray kisi ka yeh maqam kahan ho sakta hai ke woh apne amal ko koi barra amal samjhe aur is ghurur mein mubtala ho ke Allah ka jo haq us par tha woh usne ada kar diya hai. Allah ka haq is se bohot baala o baratar hai ke koi makhlooq isse ada kar sake. 

 

Allah Ta'ala ka yeh farmaan musalman ko hamesha ke liye yeh sabaq deta hai ke apni kisi ibadat o riyaazat aur kisi khidmat e deen ko barri cheez na samjhein, balki apni jaan raah e khuda mein khapa dene ke baad bhi yeh samajhte rahin ke "Haq to yeh hai ke haq ada na hua." Isi tarah jab kabhi unhein koi fatah naseeb ho, isay apne kisi kamaal ka nahin balki Allah ke fazl hi ka natija samjhein aur is par fakhr o ghuroor mein mubtala hone ke bajaye apne Rab ke samnay aajzi ke saath sar jhuka kar hamd o tasbeeh aur taubah o istighfaar karen.