SURAH NO. 104 AL-HUMAZAH

 

SURAH NO. 104 AL-HUMAZAH

Naam
Pehli ayat ke lafz Humzah ko is surat ka naam qaraar diya gaya hai.

Zamana Nuzool

Zamana Nuzool is ke Maki hone par tamam mufassirain ka ittifaq hai. Aur is ke mazmoon aur andaaz-e-bayan par ghor karne se mehsoos hota hai ke yeh bhi Makkah ke ibtidaai dor mein nazil hone wali suraton mein se hai.

Mauzu aur Mazmoon

Is mein chand aisi ikhlaqi buraiyon ki mazammat ki gayi hai jo jahiliyat ke muashray mein zarparast maal-daron ke andar paayi jaati thin, jinhein har Arab jaanta tha ke yeh buraiyan fi alwaqeh is ke muashray mein maujood hain, aur jin ko sab hi bura samajhte thay, kisi ka bhi yeh khayal na tha ke yeh koi khoobiyan hain. Is ghinawne kirdar ko pesh karne ke baad yeh bataya gaya hai ke aakhirat mein un logon ka kya anjaam hoga jin ka yeh kirdar hai. Yeh dono baatein (yani aik taraf yeh kirdar aur doosri taraf aakhirat mein is ka yeh anjaam) aise andaaz se bayan ki gayi hain jis se samaa ka zehan khud ba khud is natije par pohanch jaye ke is tarah ke kirdar ka yahi anjaam hona chahiye, aur chonke duniya mein aise kirdar walon ko koi saza nahi milti, balki woh phaltay phoolte nazar aate hain, is liye aakhirat ka barpa hona qata'i na guzair hai. Is surat ko agar un suratoun ke tasalsul mein rakh kar dekha jaye jo Surah Zilzal se yahan tak chali aa rahi hain to aadmi bari achi tarah yeh samajh sakta hai ke Makkah Muazzamah ke ibtidaai dor mein kis tareeqe se Islam ke aqaid aur is ki ikhlaqi taleemat ko logon ke zehan nashien kiya gaya tha. Surah Zilzal mein bataya gaya hai ke aakhirat mein insaan ka poora naam-e-aamal is ke samne rakh diya jayega aur koi zarrah barabari naiki ya badi bhi aisi na hogi jo us ne duniya mein ki ho aur wahan us ke samne na aaye. Surah Aadiyat mein is loot maar, kasht o khoon aur ghaarat gari ki taraf ishara kiya gaya jo Arab mein har taraf barpa thi, phir yeh ehsaas dilane ke baad ke Khuda ki di hui taaqaton ka yeh istemal is ki bohat bari nashukri hai, logon ko yeh bataya gaya ke maamla isi duniya mein khatam nahi hoga, balki maut ke baad doosri zindagi mein tumhare af'al hi ki nahi, tumhari niyatoun tak ki jaanch parakh ki jayegi aur tumhara Rabb khoob jaanta hai ke kaun aadmi kis sulook ka mustahiq hai. Surah Qari'ah mein Qiyamat ka naqsha pesh karne ke baad logon ko khabardar kiya gaya hai ke aakhirat mein insaan ke achhe ya bure anjaam ka inhisar is par hoga ke us ki naikioun ka palda bhaari hai ya halka. Surah Takathur mein is maadi parastana zehniyat par giraft ki gayi hai jis ki wajah se log marte dam tak bas duniya ke faide aur lazatain aur aish o aaram aur jaah o manzil zyada se zyada hasil karne aur aik doosre se barh jaane ki koshish mein lage rehte hain, phir is ghaflat ke bure anjaam se aagah kar ke logon ko bataya gaya ke yeh duniya koi khawan-e-ighma nahi hai ke is par tum jitna aur jis tarah chaaho haath maaro, balki aik aik ni'mat jo tumhein yahan mil rahi hai is ke liye tumhein apne Rabb ko jawab dena hoga ke ise tum ne kaise hasil kiya aur hasil kar ke is ko kis tarah istemal kiya. Surah Asr mein bilkul do toke tareeqe se bata diya gaya ke no'e insaniyat ka aik aik fard, aik aik grouh, aik aik qaum, hatta ke poori duniya-e-insaniyat khsara mein hai agar is ke afraad mein iman aur amal-e-salih na ho aur is ke muashray mein haq ki naseehat aur sabr ki taleem ka ravaaj aam na ho. Is ke mu'an baad Surah Humazah aati hai jismein jahiliyat ki sardari ka aik namoona pesh kar ke logon ke samne goya yeh sawaal rakh diya gaya ke yeh kirdar aakhir khsara ka maujib kyun na ho?

 

 

 

 

 

 

 

 

 

 

 

 

 

 

 

 

 

 

 

 

 

 

 

﷽

ﭢ ﭣ ﭤ ﭥ ﭦ

1: Tabahi hai har us shaks ke liye jo (moonh dar moonh) logon par taan aur (peeth pichey) buraiyan karne ka khugar hai. 1

Tafseer:
Surah Al-Humazah 1

Asal alfaaz hain هُمَزَةٍ لُّمَزَةِ. Arabic zuban mein Humz aur Lemz ma'ni ke itibar se ba-ham itne qareeb hain ke kabhi dono ham ma'ni istemal hotay hain aur kabhi dono mein farq hota hai, magar aisa farq ke khud ahl-e-zuban mein se kuch log Humz ka jo mafhoom bayan karte hain, kuch doosre log wahi mafhoom Lemz ka bayan karte hain, aur is ke bar'aks kuch log Lemz ke jo ma'ni bayan karte hain woh doosray logon ke nazdeek Humz ke ma'ni hain. Yahan chunanch dono lafz aik sath aaye hain aur هُمَزَةٍ لُّمَزَةِ ke alfaaz istemal kiye gaye hain, is liye dono milkar yeh ma'ni dete hain ke is shakhs ki aadat hi yeh ban gayi hai ke woh doosron ki tahqeer o tazleel karta hai, kisi ko dekh kar ungliyan uthatta aur aankhon se ishaare karta hai, kisi ke nasab par ta'na karta hai, kisi ki zaat mein kerey nikalta hai, kisi par munh dar munh chotain karta hai, kisi ke peecht peeche us ki buraiyan karta hai, kahin chugliyan kha kar aur lagai bujhai kar ke doston ko laraata hai aur kahin bhaiyon mein phoot dalwata hai, logon ke bure bure naam rakhta hai, un par chotain karta hai aur un ko aib lagata hai.

ﭧ ﭨ ﭩ ﭪ ﭫ

2: Jisne maal jama kiya aur usey gin gin kar rakkha. 2

Tafseer:
Surah Al-Humazah 2

Pehle faqray ke baad yeh doosra faqrha khud ba khud yeh ma'ni deta hai ke logon ki yeh tahqeer o tazleel woh apni maal daari ke ghaman mein karta hai. Mal jama karne ke liye "Jama Maalan" ke alfaaz istemal kiye gaye hain jin se maal ki kithrat ka mafhoom nikalta hai. Phir gan gan kar rakhne ke alfaaz se is shakhs ke bakhl aur zar parasti ki tasveer nigahon ke samne aa jati hai.

ﭬ ﭭ ﭮ ﭯ ﭰ

3:Woh samajhta hai ke uska maal hamesha uske paas rahega. 3

Tafseer:
Surah Al-Humazah 3

Doosray ma'ani yeh bhi ho sakte hain ke woh samajhta hai ke us ka maal use hayat-e-jawdaan bakhsh de ga, yani dolat jama karne aur use gan gan kar rakhne mein woh aisa manhamak hai ke use apni maut yaad nahi rahi hai aur use kabhi yeh khayal bhi nahi aata ke ek waqt usay yeh sab kuch chhod kar khaali haath duniya se rukhsat ho jana pade ga.

ﭱﭲ ﭳ ﭴ ﭵ ﭶ

4: Hargiz nahin, woh shaks to chakna-chur kardene wali 4 jagah mein phenk diya jayega. 5

Tafseer:
Surah Al-Humazah, 4

Asal mein lafz Haatimah istemal kiya gaya hai jo Haatim se hai. Haatim ke ma'ani todne, kuchal dene aur tukray tukray kar dalne ke hain. Jahannam ka yeh naam is liye rakha gaya hai ke jo cheez bhi is mein pheki jayegi, wo apni gehraai aur apni aag ki wajah se tod kar rakh degi.

Surah Al-Humazah, 5

Asal mein Laiyunbadhanna farmaaya gaya hai. Nabz Arabi zuban mein kisi cheez ko be-waqit aur haqeer samajh kar pheenk dene ke liye bola jata hai. Is se khud-ba-khud yeh ishaara nikalta hai ke apni maal daari ki wajah se wo duniya mein apne aap ko bari cheez samajhta hai, lekin Qiyamat ke roz ise haqaarat ke saath Jahannam mein pheek diya jayega.

ﭷ ﭸ ﭹ ﭺ ﭻ

5: Aur tum kya jaano ke kya hai woh chakna-chur kardene wali jagah?

ﭼ ﭽ ﭾ ﭿ

6: Allah ki aag 6 khoob bhadkayi hui,

Tafseer:
Surah Al-Humazah 6

Qur'an Majeed mein is maqam ke siwa aur kahin Jahannam ki aag ko Allah ki aag nahi kaha gaya hai. Is maqam par is ko Allah Ta'ala ki taraf munsif karne se na sirf is ki holnaki ka izhar hota hai balki yeh bhi maloom hota hai ke duniya ki daulat paa kar ghamand aur takabbur mein mubtala ho jane walon ko Allah kis qadar sakht nafrat aur ghadab ki nigah se dekhta hai, jis ki wajah se us ne is aag ko khaas apni aag kaha hai jismein woh phenkay jayenge.

 

ﮀ ﮁ ﮂ ﮃ ﮄ

7: Jo dilon tak pahunchey gi. 7

Tafseer:
Surah Al-Humazah 7

Asal alfaaz hain تَطَّلِعُ عَلَى الْأَفْئِدَةِ . Tata'allu ittila' se hai, jiske aik ma'ni charhne aur upar pohanch jane ke hain, aur doosre ma'ni bakhabar hone aur ittila' pane ke. Af'idah fu'ad ki jama' hai, jiske ma'ni dil ke hain, lekin yeh lafz is uzoo ke liye istemal nahi hota jo seene ke andar dhadakta hai, balki is maqam ke liye istemal hota hai jo insaan ke shaoor o idrak aur jazbat o khwahishat aur aqaid o afkar, aur niyatoun aur iradon ka maqam hai. Diloun tak is aag ke pohanchne ka aik matlab yeh hai ke yeh aag is jagah tak pohanchegi jo insaan ke bure khayalat, fasid aqaid, napak khwahishat o jazbat, khabees niyatoun aur iradon ka markaz hai. Doosra matlab yeh hai ke Allah ki woh aag duniya ki aag ki tarah andhi nahi hogi ke mustahiq aur ghair mustahiq sab ko jala de, balki woh aik aik mujrim ke dil tak pohanch kar uske jurm ki na'iyat maloom karegi aur har aik ko uske istihqaq ke mutabiq azaab degi.

ﮅ ﮆ ﮇ ﮈ

8:Woh unpar dhaank kar bandh kardi jayegi. 8

Tafseer:
Surah Al-Humazah 8
Yani jahannam mein mujrimoon ko daal kar upar se is ko band kar diya jayega. Koi darwaza to darkinar, koi jhuri tak khuli hui na hogi.

ﮉ ﮊ ﮋ ﮌ

9:(Is haalat mein ke woh) unchey unchey sutuno mein (ghirey huey honge). 9

Tafseer:
Surah Al-Humzah 9

Fi Aamadin Mumaddadah ke kai ma'ani ho sakte hain. Ek yeh ke jahannam ke darwazon ko band kar ke un par unche unche sutoon gaarh diye jayenge. Dosra matlab yeh hai ke yeh mujrim unche unche sutoon se bandhay hue honge. Teesra matlab Ibn Abbas ne yeh bayan kiya hai ke is aag ke sholay lambe sutoon ki shakal mein uth rahe honge.