SURAH NO. 101 AL-QARI'AH

 

Naam

Pehle hi lafz Al-Qari'ah ko iska naam qarar diya gaya hai. Yeh sirf naam hi nahi hai balki is ke mazmoon ka unwan bhi hai kyun ke is mein sara zikr qayamat hi ka hai.

 

Zamana-e-Nuzool

Is ke makki hone mein koi ikhtilaf nahi hai balki is ke mazmoon se zahir hota hai ke yeh bhi Makkah Mu'azzama ke ibtidaai dour ki nazil shudah suraton mein se hai.

 

Mauzu aur Mazmoon

Is ka mauzu hai qayamat aur aakhirat. Sab se pehle logon ko yeh keh kar chonka diya gaya hai ke azeem haadisa! Kya hai woh azeem haadisa? Tum kya jano ke woh azeem haadisa kya hai? Is tarah sami'een ko kisi holnaak waqiya ke pesh aane ki khabar sun'ne ke liye tayar karne ke baad do fiqron mein un ke samne qayamat ka naqsha pesh kar diya gaya hai ke us roz log ghabrahat ke aalam mein is tarah har taraf bhagay bhagay phirain ge jaise roshni par aane wale parwanay bikhre hue hote hain, aur paharon ka haal yeh hoga ke woh apni jagah se ukhad jayenge, un ki bandish khatam ho jayegi aur woh dhunke hue oon ki tarah ho kar reh jayenge. Phir bataya gaya hai ke aakhirat mein jab logon ka hisaab karne ke liye Allah Ta'ala ki 'adalat qaim hogi to is mein faisla is buniyad par hoga ke kis shakhs ke nek aamaal bure aamaal se zyada wazni hain aur kis ke nek aamaal ka wazan us ke bure aamaal ki banisbat halka hai. Pehli qisam ke logon ko woh aish naseeb hoga jis se woh khush ho jayenge, aur doosri qisam ke logon ko is gehri khai mein phenka jayega jo aag se bhari hui hogi.

 

 

 

 

 

 

 

 

 

 

 

 

 

 

﷽

ﭜ ﭝ

1:Azeem hadisa! 1

Tafseer:
Surah Al-Qari'ah 1


Asal mein lafz Qari'ah istemal hua hai jiska lafzi tarjuma hai "thonkne wali." Qar' ke ma'ni kisi cheez ko kisi cheez par zor se maarne ke hain jisse sakht awaaz nikle. Is lughwi ma'ni ki munasibat se Qari'ah ka lafz holnaak haadise aur badi bhaari aafat ke liye bola jata hai. Maslan Arab kehte hain "qar'atuhum al-qari'ah," yani falan qabeelay ya qaum ke logon par sakht aafat aa gayi hai. Quran Majeed mein bhi ek jagah yeh lafz kisi qaum par badi museebat naazil hone ke liye istemal hua hai. Surah Ra'd mein hai: "Wa la yazalu alladhina kafaru tuseebuhum bima sana'u qari'ah." "Jin logon ne kufr kiya hai un par un ke kartooton ki wajah se koi na koi aafat naazil hoti rehti hai." (Ayat 31) Lekin yahan Al-Qari'ah ka lafz qayamat ke liye istemal kiya gaya hai aur Surah Al-Haaqqah mein bhi qayamat ko isi naam se mosoom kiya gaya hai. (Ayat 4) Is maqam par yeh baat nigah mein rehni chahiye ke yahan qayamat ke pehle marhale se le kar azaab o sawaab ke aakhri marhale tak poore aalam-e-aakhirat ka yakja zikr ho raha hai.

ﭞ ﭟ ﭠ

2:Kya hai woh azeem hadisa?

 ﭡ ﭢ ﭣ ﭤ ﭥ

3:Tum kya jaano ke woh azeem hadisa kya hai?

 

 ﭦ ﭧ ﭨ ﭩ ﭪ ﭫ

4:Woh din jab log bhikre huey parwano ki tarah

ﭬ ﭭ ﭮ ﭯ ﭰ

5:Aur pahad rang bi rangi dhunki hui oon (wool) ke tarah honge. 2

Tafseer:
Surah Al-Qari'ah 2


Yahan tak qayamat ke pehle marhale ka zikr hai. Yani jab woh haadisa azeem barpa hoga jiske nateejay mein duniya ka saara nizaam darham barham ho jayega, us waqt log ghabrahat ki haalat mein is tarah bhagay bhagay phirain ge jaise roshni par aane wale parwanay har taraf paraaganda o muntashir hote hain, aur pahad rang barang ke dhunke hue oon ki tarah urne lagenge. Rang barang ke oon se pahadon ko tashbeeh is liye di gayi hai ke un ke rang mukhtalif hote hain

ﭱ ﭲ ﭳ ﭴ ﭵ

6:Phir 3 jiske palade (scales) bhaari honge,

Tafseer:
Surah Al-Qari'ah 3
Yahan se qayamat ke doosray marhale ka zikr shuru hota hai jab dobara zinda ho kar log Allah Ta'ala ki adalat mein paish honge.

ﭶ ﭷ ﭸ ﭹ ﭺ

7:Woh dil pasand aish mein hoga.

ﭻ ﭼ ﭽ ﭾ ﭿ

8:Aur jiske palade halke honge, 4

Tafseer:
Surah Al-Qari'ah 4


Asal mein lafz mavaazin istemal hua hai jo mauzoon ki jama bhi ho sakta hai aur meezan ki jama bhi. Agar is ko mauzoon ki jama qarar diya jaye to mavaazin se muraad woh aamaal honge jin ka Allah Ta'ala ki nigaah mein koi wazan ho, jo us ke haan kisi qadr ke mustahiq hon. Aur agar isey meezan ki jama qarar diya jaye to mavaazin se muraad tarazu ke pallaay honge. Pehli surat mein mavaazin ke bhaari aur halka hone ka matlab nek aamaal ka buray aamaal ke muqable mein bhaari ya halka hona hai kyun ke Allah Ta'ala ki nigaah mein sirf nekiyan hi wazan rakhti hain aur qadr ke mustahiq hain. Doosri surat mein mavaazin ke bhaari hone ka matlab Allah Jalla Sha'nahu ki meezan-e-adl mein nekiyon ke pallay ka buraiyon ke pallay se zyada bhaari hona hai, aur un ke halka hone ka matlab yeh hai ke bhalaaiyon ka palla buraiyon ke pallay ke muqable mein halka ho. Is ke ilawa Arabi zubaan ke mahaawaray mein meezan ka lafz wazan ke ma'ni mein bhi istemal hota hai, aur is ma'ni ke lehaaz se wazan ke bhaari aur halka hone se muraad bhalaaiyon ka wazan bhaari ya halka hona hai. Beharhaal, mavaazin ko khwah mauzoon ke ma'ni mein liya jaye, ya meezan ke ma'ni mein, ya wazan ke ma'ni mein, mada'wa ek hi rehta hai, aur woh yeh hai ke Allah Ta'ala ki adalat mein faisla is buniyad par hoga ke aadmi aamaal ki jo punji le kar aaya hai woh wazni hai, ya be-wazan, ya us ki bhalaaiyon ka wazan us ki buraiyon ke wazan se zyada hai ya kam. Yeh mazmoon Qur'an Majeed mein muta'addid maqamaat par aaya hai jin ko nigah mein rakha jaye to is ka matlab poori tarah wazeh ho jata hai. Surah A'raf mein hai, "Aur wazan us roz haqq hoga, phir jin ke pallay bhaari honge wahi falaah payenge, aur jin ke pallay halke honge wahi apne aap ko khassare mein mubtala karne walay honge" (Ayat 8-9). Surah Kahf mein irshad hua, "Ae Nabi, in logon se kaho, kya hum tumhein bataain ke apne aamaal mein sab se zyada nakaam o naamuraad log kaun hain? Woh ke duniya ki zindagi mein jin ki saari sa'i o jehd raah-e-raast se bhatki rahi aur woh samajhte rahe ke woh sab kuch theek kar rahe hain. Yeh woh log hain jin hon ne apne Rab ki aayaat ko maanne se inkaar kiya aur us ke huzoor paishi ka yaqeen na kiya, is liye un ke saare aamaal zaya ho gaye, qayamat ke roz hum unhein koi wazan na denge" (Ayat 104-105). Surah Anbiya mein farmaya, "Qayamat ke roz hum theek theek tolne wale tarazoo rakh denge, phir kisi shakhs par zarra barabar zulm na hoga, jiska raai ke daane barabar bhi kuch kiya dhara hoga, woh hum le aayeinge aur hisaab lagane ke liye hum kaafi hain" (Ayat 47). In ayaat se maloom hota hai ke kufr aur haqq se inkaar baja'e khud itni bari burai hai ke woh buraiyon ke palla ko lazman jhuka de gi aur kaafir ki koi neiki aisi na hogi ke bhalaaiyon ke pallay mein us ka koi wazan ho jisse us ki neiki ka palla jhuke. Albattah momin ke pallay mein imaan ka wazan bhi hoga aur us ke saath un nekiyon ka wazan bhi jo us ne duniya mein keen. Doosri taraf us ki jo badi bhi hogi woh badi ke pallay mein rakh di jayegi. Phir dekha jayega ke aakhir neiki ka palla jhuka hua hai ya badi ka.

ﮀ ﮁ ﮂ

9:Uski jaaye qarar (thikana) gehri khayi (pit) hogi. 5

Tafseer:
Surah Al-Qari'ah 5


Asal alfaz hain ummuhu haawiyah "us ki maan haawiyah hogi". Haawiyah hawa se hai jiske ma'ni oonchi jagah se neechi jagah girne ke hain, aur haawiyah us gehre garhay ke liye bola jata hai jisme koi cheez gire. Jahannum ko haawiyah ke naam se is liye moosoom kiya gaya hai ke woh bohot ameeq hogi aur ahl-e-jahannum us mein upar se phainkay jayenge. Raha yeh irshad ke "us ki maan jahannum hogi", is ka matlab yeh hai ke jis tarah maan ki god bachay ka thikana hoti hai, usi tarah aakhirat mein ahl-e-jahannum ke liye jahannum ke siwa koi thikana na hoga.

 

 

ﮃ ﮄ ﮅ ﮆ ﮇ

10: Aur tumhein kya khabar ke woh kya cheez hai?

ﮈ ﮉ ﮊ

11: Bhadakti hui Aag. 1

Tafseer:
Surah Al-Qari'ah 6
Yani woh sirf ek gehri khai hi na hogi balkay bhadakti hui aag se bhari hui hogi.